News

News aus

 Minden - Dankersen

Ortseingangsschilder im Stadtteil Minden Dankersen mit einem Zusatz,

 eine Betrachtung von Wilma Stahlhut

danksen

Plattdüüdske Ortsschiller

Vör een poar Doagen stond in`e Zeitung, dat in NRW boole plattdüütske Ortsschiller erlaubet werd.  Es dat so?

De neie Heimatministerin van NRW Ina Scharrenbach (CDU) well sik dorför insetten, dat plattdüütske  „Zusatzbezeichnungen“ up Ortsingangsschillern in NRW in Taukunft wir erlaubet wern schöllen, wenn de Kummune dat wünsket.

Oh, dat es jo wat ganz moiet, ower werd dat kurmen?

Leiwe Bürgermester un leiwe Ortsvörsteher van usen Dörpern werd rege un settet jau dorför in. Dat wür jo ok gaut utseihen, wenn up dat Ortsingangsschild Minden no Minnen stünne.

Oder Dankersen = Danksen, Gehlenbeck = Germke, Rahden =Roahn.

De Plattdüütske Sproake mot erholen blieben, dorför set sik de „Verein zur Förderung der plattdeutschen Sprache im Mühlenkreis Minden-Lübbecke e. V.“ in. Wi gohet in Kinnergoarn un Grundschaule un willt de Kinner Plattdüütsk lehrn. Plattdüütsk es eene Sproake  un sei mot füddergirben wern, dat ok use Noahkurmen dat küert.

NRW hätt jo bi de EU – Charta för de Regional- un Minderheitensproake – van`n Europarot rümmemosert. De Charta es in Joahre 1999 rutekurmen un hätt ok „Niederdeutsch“ - use Plattdüütsk-, als Regionalsproake anerkennt un sei ünner Schutz stellt. Ower NRW hätt gliek den Deil 3 – Bildung – utschloaten. Dat heitet in`n Kloartexte, dat use Bundesland NRW nix för de Sproakenbildung dauen well. In dän norddüütsken        Noahborlännern es man dän Westfoalen oll een Stücke vörut. Dor werd in Kinnergoarn, Schaule un ok an de Universität Plattdüütsk e`lehrt un ok studiert. Un dor staht ok uppe Ortsingangsschiller de plattdüütske Beteiknunge.

In`n lesten Joahrhunnert wurd bi us in NRW seggt, dat Plattdüütsk eene primitive Sproake för dumme Lüe van`n Lanne es. Inne Volksschaule wurd den Kinnern glieks klor moaket, dat man nu ers mol onnik küern lehrn möste, dat heitede, „Hochdeutsch“. Un wer dat nich begriepen konn, däne wurd dat van`n Schaulmester up ne ganz gefeuhlvulle Oart bi`e brocht.

Vandoage schall Plattdüütsk wir mehr küert wern, dorför settet sik de Plattküerer in.

Plattdüütsk es eene eigene Sproake leiwe Lüe van de Politik, erkennt Plattdüütsk in de Charta an un loatet Ortsnoamen un ok de Sproake füdder bestohen. Denn kann ok in NRW plattdüütsk studiert wern. So kürnt wi füdderkurmen mit Platt.

Leiwe Hüter in usen Bundeslanne van Bildung un Kultur,settet jau dorför in , dat in nächster Tied de Verbote för use Plattdüütsk uppehoaben werd.

Heimatverein Dankersen e.V.

Heimathaus Dankersen

Hasenkamp 7b

32423 Minden